استغاثات على الفيس بوك تطالب بالحرية_لمحمود_درج_مؤسس_دار_بسمة_للإيواء . ما حقيقتها ؟

 

محمود درج مؤسس دار بسمة لايواء المشردين

انتشرت على صفحات الفيس بوك  استغاثات ومناشدات تحت هاشتاج

  الحرية_لمحمود_درج_مؤسس_دار_بسمة_للإيواء

وتم تداول هذة القصة التى لا يعلم موقع شرقية تى فى مدى صحتها بخصوص سجن محمود درج مؤسس دار بسمة لايواء المشردين .. وما يتداول على الفيس عن محمود درج

#قصة_محمود_درج

اتحبس الولد !!

=================

اتحبس محمود درج من شهر ومحدش مهتم .. وكأن اللي اتحبس دا مش واحد مننا .. وكأننا كلنا عاملين نفسنا مش عارفين أو مش واخدين بالنا .. هو إيه اللي جرالنا يعني هنسيبه كدا مش هنسأل فيه .. هو دا جزاته مننا على اللي عمله لما ضيع شبابه وأحلى سنين عمره في مشروع قومي قدر يجمع فيه كل أهالينا المشردين من الشوارع ومن على الأرصفة ومن تحت الكباري ومن كل الأماكن الخاصة بالمشردين علشان ينقلهم لأماكن آدمية مجهزة بكافة الخدمات الإنسانية ويكون في خدمتهم ورعايتهم صحيا ونفسيا ومعيشيا هو وكل الشباب اللي كانوا بيساعدوه وادونا كلنا طاقة أمل إن الدنيا لسة بخير وفيها شباب بيحبوا الخير من غير أي مقابل لأن الشباب دول كلهم كانوا بيصرفوا من جيبهم في بداياتهم لحد ما ابتدت الناس تعرف حكايتهم وتتعاطف معاهم وبقينا كلنا نساعد معاهم على قد ما نقدر لو حتى بكيس رز أو إزازة زيت أو ملابس زيادة عندنا علشان نوفر الأكل والملبس لأهالينا المشردين اللي بقوا بفضل الله سبحانه وتعالى ثم بفضل محمود درج وزمايله في معيشة آمنة.

الشاب اللي عمل كل دا والتفينا كلنا حواليه دلوقتي بسبب عمل الخير اللي قام بيه بقى هو اللي مشرد ومرمي في سجن مظلم وضاع مستقبله وضاع عمره بعد ما ضاع شبابه في عمل إنساني ومعملش زي شباب كتير أوي قاعدين على القهاوي ليل ونهار مبيعملوش حاجة في حياتهم وفي الآخر يكون جزائه بدل ما الدولة تكرمه للأسف اترمى في غيائب السجن علشان يضيع الباقي من مستقبله وعمره وراء قضبان حديد.

في البداية مكنتش مصدق الخبر وحاولت أتصل على تليفون محمود لقيته مغلق عملت المستحيل علشان أوصله وكلمت أصدقاء ليا في بلده إنشاص البصل علشان يجيبولي تليفون أي حد من أقاربه وفعلا بعتولي تليفونهم وكلمتهم وخدت موعد ووصلت ليهم وكانت المفاجأة الصادمة ليا بجد ولحد دلوقتي مش مستوعبها انهم قالولي محدش سأل فينا خالص ولا في محمود من يوم ما اتحبس .. يا أهل الشرقية بقا دا اسمه كلام دا احنا شعب الكرم والرجولة .. والمعدن الأصيل اللي بيظهر وقت الأزمات .. أكيد زي ما اتجمعنا كلنا حوالين محمود ومشروعه الخيري دار بسمة للإيواء هنتجمع دلوقتي بجوار أهله ونكون كلنا معاهم ونساند محمود زي ما كنا قبل كدا لحد ما ربنا يرجعله حقه ويخرج من أزمته بفضل الله عز وجل ثم بفضل مجهودكم كلكم الكبير قبل الصغير.

على الله حكايتنا وحكايتنا هي حكاية محمود درج اللي لازم تبقى في كل مكان ولازم صوتنا يوصل لأعلى سلطة في الدولة/ للسيد الرئيس الأب لكل المصريين فخامة الرئيس عبدالفتاح السيسي ..

عاوزين نطالب بعفو رئاسي عن محمود وعاوزين أعضاء مجلس النواب وأعضاء مجلس الشيوخ عن محافظة الشرقية يقدموا استجواب أو طلب إحاطة عن حبس محمود درج وازاي إن قصة شاب كافح علشان يساهم في رقي وطنه يكون دا جزائه ودي نهايته.

أنا زرت محمود في السجن بعد ما استأذنت أهله إني أروح الزيارة معاهم ولقيته في حال محدش فينا يرضاه على حد من ولاده ومش عاوز أقول أكتر من كدا لأن فعلا اللي بيمر بيه محمود فوق طاقة أي إنسان تخيل حضرتك تبقى عامل عمل خير وحاجة عظيمة وتكون المكافأة لك هي السجن

عاوزين تكاتف كل أعضاء مجلس النواب ومجلس الشيوخ بلا استثناء لتأييد قضية محمود درج ونثمن الدور الذي قام به كل من السادة الأعضاء ماجد دياب ومجدي عاشور وأحمد سيد أحمد شقيق المرحوم الحاج علي سيد أحمد اللي زاروا محمود وبيحاولوا يساعدوه قدر المستطاع .. نشكرهم جميعا جزيل الشكر والتقدير على مجهوداتهم ولكن تظل هذه الجهود تمثل واحد في المائة من المأمول والمطلوب منهم ومن باقي النواب وخاصة نواب محافظة الشرقية.

محمود درج التف حواليه جميع فئات الشعب الشرقاوي وأيضا بعض من سكان المحافظات الأخرى وكمان زاره في الدار معظم المسئولين من وزراء زي وزير الشباب والرياضة الدكتور أشرف صبحي اللي زار دار بسمة وكان في استقباله محمود درج وأيضا محافظ الشرقية السابق اللواء خالد سعيد والدكتور ممدوح غراب محافظ الشرقية الحالي ومعظم وكلاء كافة الوزارات وإدارة حقوق الإنسان بمديرية أمن الشرقية وعلى المستوى الشعبي كل الفئات بداية من أعضاء مجلس النواب ومهندسين وأطباء ومحامين ومدرسين ومحاسبين وصحفيين وإعلاميين وقيادات من الجامعة ومن كافة الطبقات الإجتماعية كلنا التفينا حوالين محمود ومشروعه الخيري الإنساني علشان كنا كلنا عارفين ومتأكدين إنه إنسان صادق وإن مشروعه مشروع إنساني لكن للأسف محمود ضاع وضاع مشروعه زي ما كل شيء جميل بيضيع بفعل فاعل.

أنا عن نفسي هسعى جاهدا إني أعمل فيلم قصير عن قصة محمود درج علشان يوصل هذا الفيلم لكل المسئولين في البلد علشان يعرفوا قد إيه التضحية والمعاناة اللي الشاب دا شافهم من أول ما ابتدى يمشي في طريق حلمه وأتمنى لو في شاب مناسب للدور في عمر العشرينات يتواصل معايا ومخرج ومصور وممثلين يتطوعوا لتنفيذ هذا العمل.

هذه الحملة للدفاع عن محمود درج ما فيش فيها أي صورة من صور جمع تبرعات أو نقود لمساعدة محمود درج لأننا مانعين الموضوع دا نهائي فمن فضلكم أي حد يقولكم اتبرعوا بأي فلوس لمساعدة محمود درج ما تسمعوش كلامه وبلغوني فورا علشان مش عاوزين أصحاب النفوس المريضة يلاقوا أي مدخل لهدم هذه الحملة اللي إن شاء الله هتنجح بفضل تعاونكم جميعا وفي إنتظار آرائكم واقتراحاتكم أصدقائي الأعزاء.

وبطلب من حضراتكم جميعا تفضلا منكم انكم تشاركوا المنشور دا على صفحاتكم وفي جروبات الفيس والواتس علشان حكاية محمود درج توصل لكل مكان في مصر .. وكمان ياريت كلكم تغيروا صورة البروفايل بتاعتكم على الفيس والواتس وتحطوا صورة محمود درج اللي نازلة مع البوست علشان كلنا نبقى شخص واحد هو محمود درج.

#الحرية_لمحمود_درج_مؤسس_دار_بسمة_للإيواء

#المنسق العام لحملة الدفاع عن محمود درج .. لابد من إعادة محاكمته من أجل إظهار الحقيقة

هذة المناشدات والاستغاثات تتطلب ان يكون هناك شفافية فى معرفة حقيقة سجن محمود درج و ما هى الجريمة التى ارتكبها و ان ينظر بعين الاعتبار الاعمال الخيرية التى قام بها واستجابة للاصوات التى تطالب بالنظر فى العفو عن محمود درج مؤسس دار بسمة للايواء بالشرقية .